Ofgeloopn wekke he’w nog foto’s bekekkn van’n pröttel van’t oole hoes. Vuural het droadwaark van de rikkinge was zeer gevarieerd, alles wörn der vuur gebroekt: takkedroad, betonstoal, plastic gaas, verzeenkt gaas, e.g.z.m.d. (en goat zo mear duur). Ik binne blie da’w dit mooi opperuumd heb. Op 6 september 2016 schreaf ik het volgender der oawer:
Kenn ie het verhaal van un Gordiaansen knup? Alexander un Grootn höw met een’n slag van zien zwaard un meuilijken knup duur, den te lastig was um met de hàànde te ontwarrn. Wee denn knup kon lösmaakn, zol heerser oawer Azië wörn (volgens het Orakel van Delphi). Wat, dach Alexander, dat wil ik wàl wörn! En met eenn houw van zien zwaard ontwarrn hee den knup. En eawn later, noar un paar veeldslaangn zo hier en daor, was hee heerser van Azië.
Zo har ik vanoand las van un Waterhooksen knup.De rikkinge höng van roestig takkedroad, dröaks, betonmattn en gaas an mekaar. En ik mear wosseln um het lös te kriengn. Het Orakel van Eawersdiek (de vrouwe) harre èzeg dat ik dan heerser van Waterhook zolle wörn. Het is mie dan ok èlukt um de boele oet mekaar te kriengn. Neet met het zwaard mear met de knieptange. En no mear wachen op de volgende veeldslaangn. Ik zalle de knieptange en combinatietange al vaste kloar lengn…
