Seends vanwekke zee’k bie oons grote antaln vleeng boangn het grös en op de roetn. Het bint van die zwarte vleengn met un soort angel. Ik heb het es noaezoch en het blik dat dit de meartse vleege is. He is neet eneumd noar de moand Meart mear noar St Marcus den op 25 april zienen naamdag hef. Dan zeej ze namelijk vake. Behalve zienen verhaspelten naam hef dizze vleege ok nag las van un zwoare identiteitscrisis want feitelijks is het un mugge. Um datte zovölle lik op un vleege en um de leu neet of te schrikn heb ze em mear un vleege neumd. A’j ze zeet vleengn, dan lik het un soort kruzing tusken un vleege en un miegeape. He hef twee grote bolle oongn (het kealke) en het lik datte un angel hef. Dit bint echter de hangende achterpeute. Zie leawt mear un paar wekke en leawt alleanig van plaantnsappn. Vandoar dat zie miene meideurnhaag plundert, want doar zit no à volop sappig blad an. Het meeste last köj hemn van de larven die leawt van dooie plaantnresten en van gröswortels. Wie zaggen der gistern ok wat paarn, en dat was duudelijk un geval van slooooow seks. Zie zatn wà meer dan un uur op mekaa vasteplakt…
