Het gàànzenakkoord is oet mekaar èspat. Dit was un akoord tussen de boern en de natuurorganisaties um op deervreendelijke wieze het gàànzenoawerschot in Nederlàànd te beheern. Un àànder woord vuur beheern is ofscheetn en vergassen, mear dat kleenkt wier zo cru. Mear dat akkoord geet nò neet duur en doarumme kan dur óp ongelimiteerde wieze op de gàànzen jach wörn èmaakt.
Tenminste, dat wilt de boern wàl en de vogelbescherming neet. Dat leawert dus un probleem op. Doar is nog neet direct een pankloar antwoord vuur dit probleem, alhoewel ze in de omringende lààndn de gàànzen gewoon in de panne doot…
Un ààndere oplossing is um het plattelàànd meender “gansvriendelijk” te maakn, dus meender “natte natuur” maakn. Mear doar zeek neet völle toekomst in, want het umgekeerde gebuurt hier juust. De Vitens hef net teangn hoge kosten un waterretentiegebied èmaakt in’n Beushook, de Regge kan wier volop meanderen, in Ypelo is de Doorbraak net offemaakt en bie oons in de buurte bint ze drok bezig met het verbrèèn van un Eantergraawn en un Elsgraawn. Ofwel, doar koomp steeds meer water bie en het wordt de kommende joarn volop priesscheetn vuur de jagers…
De gàànzen op onderstoanden foto hebt het òk àl begreppn en maakt dat ze wegkomt.
