Het gung mie vandaage helemoal mis met foto’s maakn. En wat dooj dan? Juust, ie zet ur onderwaarpn op diej aanders nooit op’n foto zet.
Das disse keer un rulke peppermuntn. Ha’k nog in’n auto (de luukse waangn zo asse dat soms ok zengt) lingn van de kaarke van gistern (in Riessen zengt ze “koarke”, meer angezeen ik oet Rectum komme, zegge ik “kaarke”).
Het bint peppermuntn van de oole koningine (het maark dus en neet un doatum). “De oole koninginne”, dat zee mie vaa atte oawer Wilhelmina kuiern. Op 31 augustus was Wilhelmina jeurig en dus haj vrogger op den dag ok Konginnedag.
Mer ja, alles verandert, wie kriengt ne koning/kunning op 30 april, de dames bint oet regeert en wodt dan ok “renamed” (op zien Engels). De oole koninginne wodt noa 30 april de super-oole koninginne, Juliana wodt dan de heele oole koninginne en Beatrix maw dan de oole koninginne neumn.
Ik zee allening de peppermuntn nog neet zo gauw van naam verandern. “Beatrix pepermunt” kleenkt neet. Miskien is het better om “Beatrix Babbelaars” te introduceren, dat bekt lekker en ie kunt er gedurende nù lange preake ok lange wille van hemn.
